“Цагаан хад”суурьшлын бүсэд эрүүл мэндийн үзлэг хийж эхэллээ

Манай улсын нүүрсний экспортын гол гарц болох Тавантолгой-Гашуунсухайт чиглэлд зөвшөөрөлтэй 161 аж ахуйн нэгжийн 13079 тээврийн хэрэгсэл 24 цагаар нүүрс тээвэрлэлт хийж байна. Нүүрс тээвэрлэлтийн үйл ажиллагаанд хяналт тавих чиг үүргийг хэрэгжүүлж буй төрийн албан хаагчид болон жолооч нарын эрүүл, аюулгүй орчинд ажиллаж амьдрах нөхцлийг сайжруулах талаар шаардлагатай арга хэмжээ авахыг Засгийн газраас “Эрдэнэс Монгол” ХХК болон холбогдох яамдад үүрэг болгосон.

Энэ дагуу “Эрдэнэс Монгол” компани Зам, тээврийн хөгжлийн яам, Эрүүл мэндийн яам, Автотээврийн үндэсний төв болон “Гашуун Сухайт Авто Зам” компанитай хамтран Өмнөговь аймгийн Ханбогд сумын Хайрхан багийн нутаг дахь “Цагаан хад” суурьшлын бүсэд амьдарч буй иргэд, албан хаагчид болон тээврийн жолооч нарт эрүүл мэндийн тусламж үйлчилгээ үзүүлэх үнэ төлбөргүй үзлэгийг энэ сарын 16-нд эхлүүллээ.

Энэхүү үзлэг нь долоо хоногийн турш үргэлжлэх бөгөөд үзлэгийг УНТЭ, ГССҮТ, ЭХЭМҮТ, ХӨСҮТ, АӨСҮТ, СЭМҮТ, НЭМҮТ-ийн нарийн мэргэжлийн 36 эмч, мэргэжилтэн, Өмнөговь аймгийн эрүүл мэндийн байгууллагын 16 ажилтан хамтран хийж, шаардлагатай эмчилгээ үйлчилгээг үзүүлж, эм, холбогдох тусламжийн материалуудыг олгож байна. Мөн энэ хугацаанд Гэмтэл согог судлалын үндэсний төвийн эмч нар Ханбогд, Цогтцэций сумын иргэд болон Тавантолгой-Гашуунсухайт чиглэлд тээвэрлэлт хийж буй жолооч нарт дуудлагаар яаралтай түргэн тусламжийн үйлчилгээ үзүүлж байгаа юм.

Үзлэгийн хүрээнд дотор, зүрх судас, зүрхний цахилгаан бичлэг, мэс засал, мэдрэл, нүд, чих хамар хоолой, эрүү нүүрсний мэс засал, халдварт өвчин судлал, сүрьеэ, рентген оношилгоо, эрэгтэйчүүд, эмэгтэйчүүд, хүүхэд, шүд эрүү нүүр, сэтгэл засал болон хооллолт, орчны эрүүл мэндийн зөвлөгөөг өгөх аж. Мөн лабораторийн шинжилгээг газар дээр нь хийж байгаа бөгөөд энэ хүрээнд цусны ерөнхий шинжилгээ, шээсний ерөнхий шинжилгээ болон биохимийн шинжилгээг хийж байна. “Цагаан хад” суурьшлын бүсэд зохион байгуулж буй эрүүл мэндийн үзлэг оношилгооны зардлыг “Эрдэнэс Монгол” компани бүрэн хариуцаж байгаа юм.

Эрүүл мэндийн сайд Д.Сарангэрэл “Ар гэрээсээ амьдралын эрхэнд хол байгаа жолооч нар маань их баярлаж байна. Хүнд хүчир хөдөлмөр эрхэлж улс орныхоо эдийн засагт хувь нэмэр оруулж байгаа жолооч нар энэхүү үзлэг оношилгоонд идэвхтэй оролцох хэрэгтэй. Төр, хувийн хэвшлийн хамтын ажиллагааны хүрээнд тээвэрлэлт хийж буй жолооч нар болон энэхүү суурьшлын бүсэд ажиллаж, амьдарч буй иргэдэд зориулан үйлчилгээний цогцолбор байгуулахаар ажиллаж байгаа. Уг цогцолборт эрүүл мэндийн байнгын ажиллагаатай төв бий болно” хэмээв.

Мөн энэ үеэр Зам, тээврийн хөгжлийн сайд Я.Содбаатар Тавантолгой-Гашуунсухайт чиглэлийн авто замын засвар, үйлчилгээ болон бүтээн байгуулалтын ажилтай танилцав. Төр, хувийн хэвшлийн түншлэлийн хүрээнд хийгдэж буй Гашуунсухайт авто замын 228 дахь километрт 2600 автомашины зогсоол, эмнэлэг, цагдаагийн байр, 300 хүний багтаамж бүхий хоолны газар, 200 хүний үзвэрийн танхим бүхий “Тайван цогцолбор”-ын бүтээн байгуулалтын ажил өрнөж байна. Жолооч нарын аюулгүй байх үндсэн нөхцөл нь тав тухтай, тохилог орчноор үйлчлүүлэх явдал гэж үзэж, цогцолборыг ашиглалтад оруулахаар шуурхай ажиллаж буйг Зам, тээврийн хөгжлийн сайдад танилцууллаа. Энэхүү цогцолбор ашиглалтад орсноор Тавантолгой-Гашуунсухайт чиглэлийн авто замд тээвэрлэлт хийж буй жолооч нар төрийн үйлчилгээг авах боломжтой болох юм. Үүнээс гадна Гашуунсухайт авто замын хоёр дахь километрт 1000 машины зогсоол бүхий цогцолбор байгуулахаар ажиллаж байна. Дээрх цогцолборууд 2019 оны эхний улирлаас эхлэн шат дараатайгаар ашиглалтад орох юм.

“Эрдэнэс Монгол” ХХК ирэх онд замд үүссэн эвдрэл гэмтлийг дэвшилтэт технологи ашиглан жилийн дөрвөн улиралд цаг алдалгүй шуурхай засварлах, зам дагуу түр зогсоолуудыг нэмж барих, эвдэрч осолдсон автомашин, жолоочид тусламж үзүүлэх зорилго бүхий явуулын засварын үйлчилгээ бий болгохоор ажиллаж байна. Мөн 2019 онд хөдөлмөрийн аюулгүй байдал, замын хөдөлгөөний аюулгүй байдал, жолооч, ажилчдын эрүүл мэнд, ая тухтай ажиллах нөхцөлийг бүрдүүлэхэд онцгой анхааран ажиллахаар төлөвлөсөн.

Дашрамд дурдахад, Монгол Улсын Засгийн газраас өгсөн чиг үүргийн дагуу тээвэрлэлт хийж буй жолооч нарын эрүүл, аюулгүй орчинд ажиллах нөхцлийг бүрдүүлж, зам тээврийн осол зөрчлийг бууруулах чиглэлд “Эрдэнэс Монгол” компани тодорхой арга хэмжээ авч, жолоочийн амь нас, эрүүл мэнд болон тээврийн хэрэгслийн бүрэн бүтэн байдалд хяналт тавин ажиллаж байна